تدخل حكومى لحذف 35 دقيقة من برنامج "واحد من الناس"

[اسامه فؤاد]

عمرو الليثى مقدم برنامج واحد من الناس

كتب ريمون فرنسيس " جريدة اليوم السابع "

فوجئ مشاهدو التليفزيون أثناء متابعتهم إعادة حلقة برنامج "واحد من الناس" الجمعة الماضية، على قناة دريم تقديم الإعلامى عمرو الليثى، وجود العديد من المشاهد والفقرات والتعليقات والعبارات التى تم حذفها من الحلقة والتى تمت إذاعتها فى العرض الأول يوم الخميس.

وعلم اليوم السابع أن جهات أمنية اتصلت بإدارة القناة وطلبت حذف هذه العبارات والمشاهد لظواهر انتشار الزبالة فى العديد من أحياء القاهرة والجيزة ولمصنع غير مرخص بمنطقة كفر عرب أبو ساعد والعديد من العبارات التى وصفت المشاكل التى يعانى منها المواطنين وكانت الحجة التى ذكرتها الجهات الرقابية الأمنية أن هذه العبارات والفقرات تثير غضب المشاهدين ضد الحكومة والمسئولين.

وعلم اليوم السابع من مصدر موثوق به أن الدكتور أحمد نظيف رئيس الوزراء شخصيا هو الذى أجرى اتصالاته بالجهات الرقابية هذه لحذف كل ما تضمنته الحلقة من مشاهد وعبارات وتعليقات جريئة أثارت حفيظته وذلك بعد أن كشفت قصور حكومته فى أداء واجبها نحو المواطنين.

وكانت الحلقة فى عرضها الأول قد تضمنت فقرة كاملة عن القمامة انتقد فيها عمرو الليثى بشدة الحكومة ورئاسة الوزراء وتساءل كيف يمكن أن تكون كل هذه القمامة فى الشوارع والحكومة رئيسها نظيف؟. كما انتقد محافظى القاهرة والجيزة وحلوان بسبب انتشار القمامة فى شوارع محافظتهم، وطالب بمحاكمة المسئولين عن عقود الشركات الأجنبية كما انتقد عشوائية وزارة الصحة والحكومة فى التعامل مع أزمة مرض
أنفلونزا الخنازير، وعلق على اتهام فاروق حسنى لأمريكا بخيانته وقال إن المسئولين رايحين جايين على أمريكا والمتغطى بالأمريكان عريان.
وعلم اليوم السابع أيضا أن مسئولين اتصلوا بقناة دريم وأعربوا عن غضبهم من التعليقات التى أطلقها عمرو الليثى وأنه بعد الاتصال تم حذف أكثر من 35 دقيقة كاملة أى ما يعادل نصف الحلقة وجاءت الحلقة مبتورة كما اكتشف المشاهدون الذين شاهدوا الحلقة فى العرض يوم الخميس اختفاء كلمات الليثى فى الإعادة يوم الجمعة.

وينفرد اليوم السابع بنص العبارات والمشاهد التى حذفتها الجهات الأمنية من برنامج "واحد من الناس"، والتى جاءت على النحو التالى:
"الحقيقة فيه عدة موضوعات مهمة عن سوء الأداء السياسى فى تعامل حكومة نظيف مع مشاكل الناس.. وأزماتهم.. أولها أن الحكومة فى موضوع أنفلونزا الخنازير اتسمت ردود أفعالهم بالارتباك، أولا فى موضوع معامل التحاليل، وزارة الصحة خصصت 3 معامل بس فى القاهرة لتحليل عينات أنفلونزا الخنازير، ودى ماتكفيش، خصوصا واحنا داخلين على الشتا وفيه توقعات بازدياد حالات العدوى والاشتباه، ومفروض كل المعامل فى الأقاليم تتفتح، والمستشفيات كلها تستعد وتجهز لمواجهة الأزمة، مش معقول بس الموضوع بس يكون قاصر على مستشفى الحميات، كمان مفروض الحكومة تخلى العلاج متوافر فى المستشفيات الخاصة للقادرين علشان ما يزاحموش غير القادرين فى مستشفيات الحميات والمفروض كمان إن المستشفيات الحكومية، يكون فيها أماكن لعزل المرضى وعلاجهم بما لا يؤثر على باقى المرضى، ولازم الحكومة لو بتفكر بجد أنها تسمح لجميع المعامل بفحص عينات وتوسيع أماكن العلاج علشان المجتمع كله يقدر يواجه الأزمة ومش معقولة أن كل العينات تكون فى معملين أو تلاثة بس".

وتتواصل العبارات المحذوفة، "من مظاهر الارتباك أيضا أن الحكومة ووزارة الصحة حذروا الناس من الذهاب للعمرة وقالوا ممنوع الشباب من سن 25 لحد سن 75 سنة، اشمعنى يعنى، ودا من علامات الارتباك، لأنهم خوفوا الناس وأربكوا شركات السياحة وضيعوا الفرصة على بعض الناس الكبار اللى بيحلموا بالعمرة، وبعدين الناس راحت عمرة رمضان ورجعت وماحصلتش كارثة ولا حاجة.. ازاى الناس دى ممكن تصدق أى تحذيرات غير مسئولة بعد كده".
وضمن العبارات المحذوفة من البرنامج "الغريب بقى أن الحكومة اللى اتشطرت على اللى رايحين العمرة واقفة عاجزة قدام جبال الزبالة اللى مالية الشوارع فى القاهرة والجيزة وحلوان، الزبالة أصبحت مشكلة ضخمة واحنا فى أوقات أوبئة وأمراض وإذا كانت الحكومة بتطلب من الناس انهم يغسلوا ايديهم .. تفتكروا الناس ممكن تسمع الكلام ده وهى شايفة الزبالة فى كل مكان حتى قدام مقار المحافظات... وتسأل يقولوا العقد القديم والعقد الجديد وبصراحة كلام فارغ. احنا عاوزين نعرف إذا كانت الناس بتدفع رسوم النظافة أضعاف مضاعفة على فواتير الكهربا ازاى كل الزبالة دى تبقى فى الشوارع، والناس بتتكلم عن عمولات من تحت الترابيزة وعقود فاسدة، وإذا كان فيه مسئول سابق أو حالى متورط فى التعاقدات دى ليه ما يتحولش للمحاكمة.. المشكلة أننا ما بنحاسبش حد والحكومة بتهرب من الحساب والنتيجة أن القاهرة بقت كلها زبالة.

فريق البرنامج نزل وصور حالة الزبالة فى القاهرة والجيزة تعالوا نشوف فشل الحكومة فى قضية الزبالة، كمان الناس كانت بتتكلم عن موضوعات تانية، منها:
1ـ تقرير لمجلس الوزراء بيقول إننا حققنا الاكتفاء الذاتى من القمح بنسبة 58%.. وأن نصيب الفرد من اللحوم والأسماك زاد.. (أسمع كلامك أصدقك أشوف أحوال الناس أستعجب)
2ـ وزير الثقافة فاروق حسنى بعد خسارته فى اليونسكو قال إن أمريكا وأوربا تآمروا علينا(يعنى رايحين جايين على أوربا وأمريكا ومعروف للجميع أن المتغطى بأمريكا عريان)
3ـ وزير الإسكان أحمد المغربى أعلن عن مشروعات جديدة لمياه الشرب ب 3 مليارات جنيه فى 3 محافظات (لما نشوف العطش ومية المجارى اللى بيشربها نقول أفلح إن صدق)
4ـ 47% من المصريين بيشتكوا من سوء حالة المرافق والخدمات فى الأحياء عايشين فيها دا دا مش كلامى دا تقرير عن المركز القومى للبحوث الاجتماعية (ومع هذا كل يوم بنسمع تصريحات وردية عن إنجازات وهمية وكله كلام فى كلام)، كما تم حذف عبارة "نظيف والبهوات اللى فى التكييف"

أما العبارة التى أثارت حفيظة رئيس الوزراء ودفعته للتدخل والأمر بحذفها فكانت "الحكومة لسه بتفكر فى حل لمشكلة القمامة.. فالناس بتسأل: ازاى بقينا بلد مليانة بالزبالة مع ان رئيس الحكومة اسمه نظيف".

[هند محمد محمود]

انا عايزة اعرف اسثاذ عمرو غلط فى ايه؟!!!
هو اخترع حاجة من عنده؟!!
كل الدنيا من جرائد وتلفزيون بيعرض مشكلة الزبالة
المقصود ليس هذه العبارات المقصود هدم فكرة البرنامج من اساسه
لكن ورب السموات والارض ان شاء الله لن ينال احد مراده منك يا امير الاعلام ان شاء الله.

[اميره علي]

يعني اللي فرق مع الحكومه انه مايظهرش المساوئ اللي بيجيبها استاذ عمرو

يعني البلد يبقي فيها اللي فيها من فساد بس محدش يظهره علي الشاشه

بس عادي عندهم ان ده يبقي موجود

طيب ما يروحوا يصلحوا ده وميخلوش اي اعلامي يلاقي اي عيوب
هي الحكومه بتعرف تحذف بس ما بتعرفش تعالج
حسبي الله ونعم والوكيل

وشكرا يا استاذ عمرو علي البرنامج الممتاز اللي عرفنا الدينا دي ماشيه ازاي (والناس بتشتيكي من ايه)

[على الشامى]

مشكله تواجه الناس كلها بالكامل مش في مصر بس ولكن ...!!! احتفظ بتعليقي لنفسي وشكرا

[ندى من دمياط]

فعلا هيا مشكلة عامة ف جميع المحافظات
والبرنامج بيعرضها مش اكتر
فلا داعى للحذف لان كله من على ارض الواقع

[محمد حسن]

يا حكومه ياتلحقوان يا ترحموان

الصور تتكلم والناس تتالم وماذا بعد ايها المسؤلين المحترمين

قامت بحذف مشاهدة من برنامج واحد من الناس للا ستاذ الكبير عمرو الليثى

الذى يبحث عن القضيه الجده دخل الشارع المصرى لماذا تقامو بحدف هذا المشاهدة

هل للتعديل الشارع من الزباله والاخذ بالعتبر وحل المشكله ولا حذف وبس كده

!!!!!!!!!!!!!! الشارع المصرى يعيش وسط هذا الكارثة ويره كل يوم هههه لماذا

احذفة !!! مع العلم تقدم النائب المستقل مصطفى بكرى بسؤال إلى رئيس الوزراء حول أزمة انتشار القمامة خلال الآونه الأخيرة فى محافظات القاهرة والجيزة وحلوان، لتراخى الشركات الأجنبية عن القيام بمهمتها رغم ما تحصل عليه من أموال من قبل الدولة التى سبق أن وقعت مع هذه الشركات عقودا لرفع القمامة من الشوارع خاصة الشركتين الإيطالية والأسبانية....

نحنو كلنا واقفين مع الاعلامى الكبير عمرو الليثى ونرفض هذا التدخل من الحكومه ويجب على الجميع التصدى لهذا برنامج وحد من الناس هو لكل الناس
يعنى لشعب مصر كله الشكر للاستاذ عمرو قليل جدا جدا على المجهود الذى يقوم بى ..........

وانا اقول ماذا بعد هل من مزيد ايها الحكومه للناس الغلابه رحمتك بعبادك يارب
ورعم بشاعة ما حدث.. وما يحدث.. وما سوف يحدث إلا أن الرهان الآن علي عدالة السماء.. فشاء من شاء وأبي من أبي.. فالله واحد لا شريك له.. لا شريك له. وحسبنا الله ونعم والوكيل