بمناسبة ذكرى رحيل صلاح جاهين اقدم لكم بعضا من رباعياته
رباعيات صلاح جاهين
غمست سنك في السواد يا قلم
عشان ما تكتب شعر يقطر ألم
مالك جرالك إيه يا مجنون ... وليه
رسمت ورده وبيت وقلب وعلم
عجبي !!!
انا الذي عمري اشتياق في اشتياق
و قطر داخل في محطة الفراق
قصدت نبع السم وشربت سم
من كتر شوقي وعشمي في الترياق
عجبي !!!
انا الذي عشت الزمن مضيعه
بروح حزينة معفنة مضعضعه
زرعت شجرة سنط لجل انجرح
لقتها شعر البنت و مفرعه
عجبي !!
لو فيه سلام في الأرض وطمان وأمن
لو كان مفيش ولا فقر ولا خوف جبن
لو يملك الانسان مصير كل شئ
انا كنت اجيب للدنيا ميت ألف ابن
عجبي !!
العشب طاطا للنسايم و نخ
أخضر طري مالهش في الحسن أخ
عصفور عبيط اناغاوي بهجه وغنا
ح انزل هنا.. و انشا لله يهبرني فخ
عجبي !!!
أوصيك يابني بالقمر والزهور
أوصيك بليل القاهرة المسحور
و إن جيت في بالك إشتري عقد فل
لأي سمرا وقبري إوعك تزور
عجبي !!!!
غمض عينيك وارقص بخفة ودلع
الدنيا هي الشابة و انت الجدع
تشوف رشاقة خطوتك تعبدك
لكن انت لو بصيت لرجليك تقع
عجبي !!!
حاسب من الاحزان وحاسب لها
حاسب علي رقابيك من حبلها
راح تنتهي ولابد راح تنتهي
مش انتهت أحزان كتير قبلها؟
عجبي !!!
يأسك و صبرك بين إيديك وانت حر
تيأس ما تيأس الحياه راح تمر
أنا دقت مندا ومندا عجبي لقيت
الصبر مر وبرضك اليأس مر
عجبي !!
ولدي نصحتك لما صوتي اتنبح
ما تخفش من جني ولا من شبح
وان هب فيك عفريت قتيل إسأله
ما دافعش ليه عن نفسه يوم ما اندبح
عجبي !!