عرض مشاركة واحدة
  #1  
قديم 07-06-2011, 04:39 PM
محمد محمود الصايم محمد محمود الصايم غير متواجد حالياً
عضو
 

افتراضي ديوان " عايز مين يحكم مصر "

ديوان " عايز مين يحكم مصر "
للمؤلف محمد محمود الصايم - رجل أعمال - من البلينا سوهاج قرية الغنيمية عزبة راجح - مواليد القاهرة 18/1/1960 - من سكان مدينة نصر - والنشأة بشبرا ش العطار
هاوي وغير محترف
جميع محتويات الديوان تمت كتابتها قبل ثورة 25 يناير فيما عدا
- قوليلي ازاي يا مصر أرضيكِ
- جيشنا أملنا
- عريسك شهيدك
- جكومات جننت شعوبها
- الجزء الأخير من شهيد يا مصر
باقي محتويات الديوان
- انت بتقول عز
- بيتنا نسيجه واحد
- أنا مصري قولي بقى أنا زيّ مين؟
- شارون مصاص الدماء
- صحافة دنماركية
- العار
- أرواحنا رخيصة
- الثانوية علينا حق
- ارهاب العبد
- يا بوش
- التعريفة
- ديك في مهب الريح
- محتال ورا محتال
- الزبالة

" عايز مين يحكم مصر ؟ "

عايز مين يحكم مصر

عايز مين يحكم مصر ؟! سؤال العصر
يا ترى زيينا …. مننا … شارب من كوعه ؟
….ولا ساكن في قصر ؟
بالنسبة لي …. عاوز حر …. مش في الأسر
حر في شرفه …. في كرامته في عزة نفسه
ما يبقاش أسير المال …. أسير السلطة …. أسير التورتة
مقصّر إيده ….ما يطولهاش …. يلهف حته
وإذا مد إيديه …. هندعي عليه ياكل عياله …. وتيجيلوه السكته
عايزه ابن ناس شبعان إيمان ….….يحقق الأحلام والآمال
عينه مليانه ….مش شحات جاي ياكل بيت المال
ويغمس بفقر الشعب …. ومستقبل الأجيال
ويحلي بتقسيمة أراضي ….
مع نواب ووزرا ورجال أعمال
وقلبه عمران ما يقبلش إلا المال الحلال
أما عقله ….ما يتوزنش بالمال
شارب سِياسة وكَيَاسة ….ولسان
…. يترجم بيه مع الغرب والأمريكان
وعينه تكون دايما علـ البطانه ….
لــتأكلها العته ….وتبقى عدمانه
وياريت ياخد باله ….ماتبقاش زي اللي قبليها …. خربانه
يكون حاسس بالأخ والأخت بالأم والإبن ….بالأب والشب ….
الخلاصة حاسس بالشعب …. اللي لسانه ما بطلش يسب
…. وكتافه انحنت …. وإيديه دلدلت … ورجليه اتشلت …. ما بقتش تدب
…. ونفسه على وش الدنيا يقب … علشان يقدر يدي …. يقدر يحب ….
يشغل شباب في المذاكرة اطحن وتــِعب ….
وأخرتها على القهاوي بيقزقزوا في اللب
…. معذوريين شايفيين مستقبلهم اتبخر واتكب ….
كل واحد منهم حيران …. إيه في الدنيا ارتكب ….
اليأس جواهم مارد …. زي النار في الزرع هيشب
عايز مين يحكم مصر ؟….
عايز ريس …. يختار رئيس وزراء يبقى كويس
لا… هو طويل ورفيع ولا… هو تخين وقصير
ولا كبير أو صغير …. وده ممكن يخلي اختياره …. يحير
لكن لازم لما تجيبه …. كل الوزرا يشلهم ….ويغير
كفاية بقى علينا …. وزرا من زمن ….متسمرين
اللي بقى له عشرة …. واللي بقى له عشرين واللي خلل وقرب على ثلاثين
وكأنِ مصر ما فيهاش غيرهم…. اللي فاهمين
مع إن البطن ولّاده …. وياما جابت أساتذه وعلماء ومخترعين
والبُعَدَ المتسمرين في الأصل …. ما عملوش اي حاجة للمصريين
منهم اللي صدر الغاز والكهرباء ….لناس علينا متحرمين
واللي أخّر التعليم وبهدله …. وخلانا في ديل المتخلفين
واللي وزّع الأراضي على الحبايب والقرايب والمسئولين
واللي غرق الجنيه وخلاه …. مايجبش رغيفين
وضرائب عقارية ….وإتاوة إجبارية …زودت الضغط والسكر ونسبة الميتين
واللي منع زراعة القمح والرز وخلاها سياسة مستورديين
واللي دخّل أسمدة وبذور مسرطنة ….قال إيه ؟ هتخدم الزراعة والفلاحين ….
و اللي طلع علينا في الإعلام يوشوش التجار والجزارين
ان كيلو اللحمة هيوصل لميتين ….
وزي الوزير ده احنا مش عايزين
لأنه خلى شعب مصر كله مساكين ….
تِجُوز عليهم الصدقة …. وزكاة الفطر والأضحية في العيدين
واللي زود رسوم المرور …. وما طورش خدمة المواطنيين
طور وزارته ….رخام وسيارات ومكيفات …وسبنا معكوكين
واللي سيّل الدم الفاسد في بلدنا … وخلى النقي من المرفودين
وراح يتعالج على حساب الدولة بأموال مرضى غلبانين
وحسابتهم وحسابات قرايبهم …. بتزيد بالملايين
اشي أراضي …. واشي فلل …. واشي سمسرة
على حساب المطحونيين
نقول كمان عن البُعَدَ المتسمرين
اللي في عهده حرق المسارح والفنانين
واتهربت آثار قدماءنا المصريين
واتسرقت زهرة الخشخاش …. وقال إيه اتسجن فيها عشر موظفين
واللي يخرج من الوزارة مَرضِي عليه يكون من المُنعّميين
يتعين في منصِب مرتبه من الألوفات ….يعدي الخمسين
يااا عييييني على الشباب…. اللي مش لاقي وظيفة بميتين
كل ده وإحنا لسة ما اتكلمناش عن السادة المحافظين
اللي معظمهم ومش كلهم ….
صورهم في براويز على الحيطة متعلقين
ميّــة مخلوطة بالمجاري والشعب يشرب ما هُمّ مش غرمانيين
وغلابة وقعت عليهم صخرة وبقوا ببرد الشتا متلفحين
وبيوت بتقع ومخالفات بُنىَ ….بسبب قلة ضمير مهندسين
وشوارع مهربدة…. ورصيف بعد ما يتكلف حق رصيفين
يرجعوا ولاد الذين يكسروه …. هتجنن قولولي لمصلحة مين ؟؟؟؟
ولا هو شغل مصالح مع المقاولين !!!!!!


عايز مين يحكم مصر ؟
عايز اللي يسمع ويمنع ….!! يسمع الشعب
ويمنع كل وزير من ترشيح نفسه في البرلمان …. نايب
لأنه لو حضر بصفته وزير في المجلس ….أكيد بصفته نايب …. هيبقى غايب
وإزاي يستجوب نفسه في المجلس…. والله عجايب
وده ما بيحصلش …. إلا في مصرنا ….بلد الغرايب
كفاية كل شئ في البلد …. سايب
سواق الميكروباص من غير رخصة ولوحة ومن الحكم هارب
مش عايزيين الوزير الجوكر اللي مرة في السياحة …. ومرة في اسكان
سؤال ….؟ يعني هو التوت فروت ؟!!! ولا هو سوبرمان ؟ !!!
ما إحنا كلنا من ظهر مان
خلاص اذا كان كده…. يأخذه شحاته بدل جدو…. يجيب جوان
واذا اتزنقنا يدرب المنتخب ….
أكيد هنكسب كأس العالم لما نلعبه في اليابان
وبلاش رئيس وزراء بلدنا يحط وزير …. رجل أعمال
دي تبقى خيبة أمل …. لما يخلوا الوزير …. رجل إهمال
إما هيهمل في ماله …. أو هيهمل في وزارته معظم الأعمال
لأن صاحب بالين…. إما كداب…. إما وزير بوظيفة رجل أعمال
ويا عيني لو بقى كمان نائب في البرلمان ….
يبقى صاحب بالين كداب …. والثالث إما منافق
وإما وزير بوظيفة نائب ورجل أعمال
وهنفضل راجعين لوراء…. وخبتنا مش هتختر على بال

عايز مين يحكم مصر ؟!!….
عايز ريس …. يخبز عشنا برمل الصحرا
يخلي صفارها الذهبي الحار …. بلون الخضرة
يرسم خطة …. يأمن بيها الشعب لبكرة
يحسسني براحة …. لما أفكر أكون أسرة
يديني في الصحراء أرض أبنيها…. أرض أزرعها
أرض ايديا…. تخضر بلونها …. أرعاها وأصونها
تكفيني وتكفي عيالي …. واذا نفسي في حاجة أقدر أكلها
الأرض …. الأرض هي حلول الأزمة لكل أصحابها
مش تنتوفة تترمي للشعب …. وباقي التورتة السادة تلهفها
عايز مين يحكم مصر ؟

حقوق الطبع والنشر والتأليف محفوظة برقم إيداع 8403 / 2011
الناشر : وكالة صايمسون بيت الإعلان والتسويق

الطبعة الأولي وغير مخصصة للبيع
0123254440

رد مع اقتباس