الموقع الرسمي للاعلامي الدكتور عمرو الليثي - ممكن تشجعونى رايكم يهمنى جدا (عسل وطحينه)

الحقيقة طول عمرى كان نفسى اكون مذيعة ...او صحفية ..وطبعا لان العقبات كانت ومازالت امامى فكرت انى احقق حلمى ده معاكوا ..رغم انى عارفة انكم مش هاتشوفونى ..بس احسن من ما فيش...الحقيقة فكرت اعمل فى المنتدى حاجة كده زى برامج التوك شو العاشرة مساءوغيرة .
ويا ريت الادارة تساعدنى فى تحقيق حلمى ده وتخليها فقرة ثابته عندهم وارجو منهم عدم نقل الموضوع الى مقترحات لانه ليس اقتراح ولكنه تحقيق حلم...( التفكير فى الحلم سهل جدا ...وتحقيق الحلم ايضا سهل ..لكن الاصعب منهما المثابرة فى الوصول اليه.).فكرت كتيييير الحقيقة على اسم يناسب فكرتى ولقيت ان افضل اسم هو (عسل وطحينه) وسيكون شبه مقال يومى عن راى الشخصى فى الاحداث الجارية ويهمنى جدا تواصلكم معى فى كل مرة.وده اول شبه مقال .

(عسل وطحينه)(1) الانتخابات الرئاسية.

يا ترى انتوا زييى محتارين تنتخبوا مين رئيس للجمهورية؟ الحقيقة انا شايفة الموضوع محير...والحيرة مش فى اننا ننتخب مين؟ الحيرة هى احنا عاوزين ايه؟ ويا ترى الشخص اللى هاننتخبوا يصلح لالى احنا عاوزينه؟الحقيقة فى راى الشخصى العارضين لرئاسة الجمهورية كتييييييير ويبقى الدور على الجمهور اصدى الشعب ....طب يا ترى انتوا هاتنتخبوا مييين:- 1- البرادعى لانه سياسى سبور وافكارة متامركة ؟
2- ولا هاتنتخبوا الشيخ حازم لان كتييييير اوى مننا متدينين ونفسهم مصر تبقى السعودية الثانية؟
3- ولا الدكتور العوا لانه راجل محترم ومهذب وذو فكر اسلامى جديد؟
4- ولا تيجوا ننتخب اللى طلع فى المقدر جديد وائل غنيم لانه فكر شبابى مشكوك فى مصداقيته عند اغلب الشباب المصرى بس مرضى عنه من الفكر الافرنجى؟
5- ولا تيجوا ننتخب ايمن نور لانه اتظلم كتييير واتسجن اكترررر واللى داق طعم مرارة الظلم عمرة ما يظلم ؟...بس المنصب بيغير النفوس يا رجاله.

عارفين ايه العسل فى الموضوع العسل اننا بدئنا نفكر لكن الطحينه مين اللى يستاهل ننتخبوا رئيس للجمهورية؟