العودة   الموقع الرسمي للاعلامي الدكتور عمرو الليثي > عن عمرو الليثي > جريدة الخميس
إضافة رد
 
أدوات الموضوع انواع عرض الموضوع
  #1  
قديم 01-03-2010, 07:10 PM
الصورة الرمزية على الشامى
على الشامى على الشامى غير متواجد حالياً
إداره الموقع
 

افتراضي 21-3-2009عمرو الليثي يحاور مني جمال عبد الناصر واسرار وصور تعرض لاول مرة للعائله

·فى حوار صريح وجرئ مع عمرو الليثى :

·منى عبد الناصر : كنت أحكى لأبى النكت السياسية التى تهاجمة
·سالنى : عرفتى أشرف مروان منين ؟ انكسفت أقول إنى باحبه
·أشرف مروان عمره ما عاكسنى وبابا تحرى عنه من المخابرات
·أمى نصحتنى أن اتزوج من أحب حتى أعيش سعيدة
·أبى خنقنى بعد ما تقدم لى أشرف وقلل من خروجى وحلفنى إنى ماقابلش أشرف لوحدى


تفضل ابنته منى الصمت لا تحب الحديث كثيراً ولا تهتم بالظهور الاعلامى المكثف .. طوال حياتها تعيش منى عبد الناصر تحت الاضواء وطوال حياتها تحاول الهرب منها مثلما كانت تهرب من رجال الحراسة وهى صغيرة .. ورغم كل محاولات الهروب تلك كانت دائما العدسات والكاميرا تطاردها لكنها وكسيرة والدها ابداً لم تكن محلا لنميمة ولم تأت سيرتها فى شائعة .
منى عبد الناصر قررت أخيراً التخلى عن فضيلة الصمت وفتحت خزائن اسرارها إلى عمرو الليثى فى حوار صحفى جرئ وصريح حكت فيه كما لم تحك من قبل وقالت كل شئ عن والدها الزعيم عبد الراحل وعلاقتها به وكيف كان رغم مشاغلة يراقب كل تصرفاته ابنائه ويعطيهم من الاهتمام والرعاية ما يحتاجه أى ابن من والده .
على مدار عدة حلقات ستروى منى عبد الناصر للخميس اسرار علاقاتها بوالدها وبزوجها أشرف مروان وستسرد رحلتها مع رفيق عمر احتار فيه الناس كلهم وعرفته هى كما لم يعرفه أحد .


عاوز ارجع بالذاكرة من فترات بعيدة شويه.. بيت الزعيم عبد الناصر كان شكله ايه.. علاقته بالاولاد كان شكلها ايه ؟

-كنا اسرة مصرية عادية مترابطه.. بنتين وثلاث صبيان وام ووالد.. انا لم اخذ فى بالى ان بابا رئيس الجمهورية لفترة طويله فى حياتى.. كنت فى مدرسة سرايا القبه للبنات وعلمونا ان احنا علشان خاطر الامن فيه حاجات لانقوله.. فكنت بروح المدرسة كل يوم وكنا بنرجع نعمل الواجب وكان هو بيحرص انه يمضى الشهادة بنفسه كل شهر.. عمر ما ماما مضت الشهاده وعمرى ما جبت كحكه

فى الاسر المصرية الاب والام دائما بيهتموا بشئون الاولاد يعنى الاب بيذاكر للاولاد.. هل بابا كان بيذاكر لكم ؟

-لا طبعا ماكنش فاضى واحنا اطفال كانت ماما بتعلمنا ازاى نكتب وعلشان كنا فى مدرسه عربى ماكنش فيه انجليزى

لم تدخلوا مدرسة انجليزى.. يعنى اولاد رئيس الجمهورية يدخلوا مدرسة حكومه ؟

-هو قرر كده واحنا قلنا حاضر طبعا.. هو ذات نفسه علشان يتعلم كانت ماساه فازاى يدخل اولاده مدرسه مش حكومه.. وبعدين مدارس الحكومه كانت احسن.. ده انا لما دخلت الجامعه الامريكية قعدت ابكي شهرين

كان حريص انه يلتقى بكم كل يوم ؟
كل يوم كان فيه الساعه 3 لازم نلتقى على الغداء.. مافيش يوم لم تلتقى العائلة على الغداء وانا كنت فى مدرسة العجوزة كنا نيجى متاخرين شويه فكنا بنصل الساعه 3.30 ..لان دة شئ افتقده فى طفولته وهو الاسره.. والدته توفيت كان عمره 7 سنوات وراح عاش فى دمنهور فكان عنده الاسره شئ مقدس وكنا قريبين قوى.. كان عندنا فى البيت تحت غرفه سفره كانوا بيدعوا فيها رؤساء الجمهورية والحفلات الرسمية وفية فوق غرفه سفره بسيطه.. والغريبه انها لسه موجوده ..كنا بنقعد عليها كل واحد له كرسيه ..نجتمع كل يوم وكل واحد جايب نمر وحشه تبقى ماساه ..انا دائما لازم يسئلنى ايه اخر نكته طلعت وكانت كل النكت اللى تقال عليه كنت اقولها له ..انا فاكرة نكتة الثورة على السفينة بونتى و حاجات كده

س : بس دى حريه كبيرة مكنش بيزعل من النكت ؟
لا كان كل يوم ايه يامنى اخر نكته سمعتيها فكنت اقول نكت زملائى قالوها

س : طب زملائك فى المدرسة كانوا بيقولوا ليكى نكت عن بابا يعنى ممكن تسمعى نكته عن بابا وتتقبليها ؟
نكت ظريفه.. لكن لو فيه حاجات جارحه لا اسمعها وكنت انا اجيب مجله زمان اسمها البعكوكه وكان مسمينى الشرحة..

س : حجم تدخله ايه فى حياتكم الشخصية.. عبد الناصر رجل صعيدى كان يتعامل معاكم ازاى.. بيغير عليكم.. ماتخرجيش وترجعى قبل الساعة كذا ؟

-هو الحقيقة كان عنده بنتين.. اولا هدى كانت البنت المثاليه اللى كل اب يتمنى انها بنته: على طول شاطره وانا كنت اللى طول النهار قبل ما اخرج لازم ادخل اعمل تمام فى الغرفه ويشوفنى لابسة اية.. كنت صغيرة وعاوزة اضع مكياج وكنت بشوف الافلام وعاوزه اقلدهم ..
س: انا بتكلم على فترة قبل الزواج
كانت مشكلة حياته انى لاالبس منى جيب لان كانت الموضه.. فكان لازم اعدى اوريه الفستان وكان اكتر حاجه يكرها فى الدنيا المكياج ولو حطيت مكياج يقولى ادخلى شيلى المكياج دة

س : كان يهتم يعرف مين اصحابك ؟
طبعا مفيش عيد ميلاد لازم بيحضروا ويعرف مين اصحابى وكان اصحابى بيجوا عندى فى البيت ويقعدوا ويتغدوا معاه والغريبه ان انا كنت بحكم عليه.. كنت غاويه تمثيل وموسيقى كنت بحكم عليه انه لازم يحضر حفله المدرسه وكان بيجى

بس المدرسة كانت بتتقلب الرئيس عبد الناصر
بتتقلب ..بس هو كان حنين

دور الاب عبد الناصر فى اختيار الزوج لمنى عبد الناصر.. عاوز اعرف تزوجتى ازاى: هل حبيتى وقلتى له بابا انا بحب واحد وعاوزه اتزوجه وهو طالب يجى يقابلك .. احكى لى ايه اللى حصل ؟
-انا- كاى بنت- كان بيجى لها عرسان وكل العرسان اللى كانت بتيجى لى من العائلات الغنيه .. فكان بيتخض

والعرسان كانوا بيجوا ازاى ؟
بتيجى واحده صاحبة ماما تقول لها- زى اى عائله مصرية- فماما نقول له ..فماما قالت له انا كان عاجبنى اشرف قوى.. اشرف لازم يعجب كل واحده
اتعرفتى عليه ازاى ؟
-اتعرفت عليه فى ميامى فى البلاج..انا كنت بروح عند خالتى فى ميامى وهو كانت كابينه قريبته نادية الازهرى بجوار كابينه خالتى وكنا زمان بنلعب راكت وبدأنا نلعب ..فى ميامى وهكذا وبعد كده كنا فى نادى هليوبليس .. ونشات قصه الحب.. عرفت انه كان معجب بى..
لما بدأ الاعجاب المتبادل بينك وبين اشرف مروان: عبد الناصر كان عارف ولا كان من وراء بابا ؟
-لا فى الاول طبعا كان من وراه..بس ماننساش ان كنت بمشى بحراسة وبداءتالحراسه بعد اخر محاولة لاغتيالة فى المنشية وكنت برفض الحراسه وكانت وظيفتى فى الحياة انى اهرب منهم
س( كنتى بتعملى ايه ؟)
كنت اطلع من منشيه البكرى اجد سيارة الحراسه فى الاتجاه الثانى اروح ماشيه العكس واجرى بسرعة.. على ما يلفوا اكون جريت وركنت عند نادى هليوبوليس.. اوحش حاجه فى الدنيا انك تبقى شاب وتمشى بحراسه.. دلوقتى انا امنيه حياتى الحراسه

فى الفترة دى لما كنتى بتهربى من الحراسة ماكنوشبيروحوا يبلغوه ؟
لا.. قعدوا شهور خايفين وبعدين فى الاخر بلغوه

ايه حقيقة ان الحراسه واشرف مروان كنتم فى النادى وكان بيعكسك والحراسه ضربته ؟

لا.. لم يحدث..عمر ما اشرف عاكسنى.. ماكنش محتاج يعاكسنى لاننى كنت اعرفه واخته كانت صاحبتى لم يحدث.. دى كلها قصص

انتى قلتى له ازاى عن أشرف ؟
رحت قلت له ان فيه واحد.. قال لى مين ابوه.. قلت له ابوه عميد فى الجيش ابو الوفا مروان فقال لى تعرفيه من اين? فقلت له فى البلاج شفته فى ميامى.. قلت له الحقيقة.. اصل بابا كان مربينا ان الكذب جبن.. هو كان عنده الشجاعة اهم من انك لا تغلط

قلتى له بحب مروان ؟
لا مافيش حد يقول لابوه بحب ..كانت كلمه غير لائقه

قلتى له ايه ؟
قلت لة عاجبنى
قال لكى ايه؟
واثقه من اخلاقه؟ اشرف كن فيه ميزة ..كان الاول على طول وشاطر .. فكلم المخابرات وقال لهم عاوز كل حاجه عن الشخص ده..اشرف كان مش من عائله غنيه.. ابوه باشا بس اخدت اراضيهم فهو ابوه لوالده باشا ومن ناحيه امه باشا..بس مابقوش


س: بعد الثورة ؟
اه .. بالضبط فقلت له كده.. وجت كل حاجه ال c.v بالكامل من اول ماكان تلميذ شكله ايه }كان تلميذ خجول{ ونادانى وقراء لى كل التقارير اللى جابتها المخابرات عنه وعن والده وعن اخواته واعمامه ..وبعدين قال طالب مش ممكن تتخطبى لطالب.. يبقى ننتظر لما يتخرج وهو كان فى بكالوريوس علوم بقه بس كان عارف وقتها ان احنا منتظرينه لما يتخرج.. وبداءوا يخنقونى

س: ازاى ؟
رايحه فين.. ماتنزليش ماتعمليش قلت له طب اعمل ايه؟ فقال لى توعدينى انك لا تقابليه ابداً منفرده.. اذا قابلتيه يبقى فى نادى او جروب.. واحلف على المصحف اننى وفيت بوعدى رغم انى كنت ناضحه.. بس لما بابا يقول توعدى لازم توفى بوعدك اما تبقى جيانه..وانا مش عاوزة ابقى جبانه

س`وفيتى بالوعد؟
100 % .. وعدت السنه وتخرج بامتياز فجيت اقول له يتقدم.. قال لى بابا ببيشتغل ايه قلت له لا يعمل هات له وظيفه.. قال انا هجيب وظيفة لزوج بنتى لا يروح هو يشتغل.. بس رحت للمشير عامر وكنت بحبه قوى رحت له وقلت له عندى اشرف وعاوزة له وظيفه..

س : بس هل المشير كان عارف من الرئيس عبد الناصر ان فيه عريس متقدم لك ؟
اه طبعا كان المشير عارف و الرئيس السادات عارف لانهم كانوا قريبين قوى الثلاثة من بعض.. فقال لى طيب يابنتى هجيب له وظيفه وكلمته بعد الظهر جبت له الوظيفه فقال لى انتى قلتى لى النهاردة الصبح!! تانى يوم قال لى مش هعرف اوظفه غير فى الجيش فوظفه فى الجيش علشان كده هو الملازم اول كيماوى اشرف مروان.. وعينة المشير فى الجيش فى المعامل المركزية وبعدين رحت لبابا قلت له بقى عنده وظيفة

س: الم يسئلك هو اتعين ازاى ؟
طبعا المشير جه قال له

س : تفتكرى المشير استاذن الاول انه يعينه ولا عينه على طول ؟
لا ماكنش فيه استاذن ..ده كان فيه حوار على الاولاد انت وصاحبك حوار مش استاذان وخلاص اتعين واخذ ماهيه.. و اتقدم وكتبت الكتاب 14 أكتوبر اتقدم رسمى فى البيت هو وانكل مروان..

احكى اللى حصل يومها ؟
يومها قلت لبابا انهم هيجوا يتقدموا هى ماما جت قالت لى- والكلمه دى مهمه- انتى عاجبك مين؟ فقلت لا انا عاجبنى ده فقالت لى طب ده هيجيب لكى الشبكه الخاتم ومش عارف ايه وتشليهم فى الدولاب..تصحى الصبح تبصى على الدولاب ولا هتبصى بجوارك؟ فقلت لها مش هجرى على الدولاب.. قالت لى تزوجى اللى انتى عاوزاه علشان تعيشى سعيده وكانت احسن نصيحه اعطتها لى فى حياتى

لما جه حاتم يتقدم لهدى هدى عملت اللى عليها.. كلمت السكرتاريه والحرس الجمهورى ..طبعا انا لم اقول كده خالص!! فجه اشرف وانكل مروان فقالوا لهم انتم مين وبابا كل شويه يجى يقول لى: هو فيه عريس يتاخر كده!! وهو العريس قاعد عند محمد احمد بره ولم يدخل علشان انا لم اقول!! بعد شويه جه قال لى لالالا مافيش عريس يجى.. قلت له ده انا نسيت اقول للسكرتاريه!!! فجربت اكلم محمد احمد فقال لى: انا قاعد وامامى اللواء مروان واشرف وبيقولوا ان عندهم ميعاد مع سياده الرئيس! وانا مش مكتوب عندى فى الدفتر وبس.. دخلوا وخلاص

اتفقوا مع بعض المهر والشبكه كام؟ وفيه مؤخر والا لا ؟
لا مافيش مؤخر.. وانا مهرى كان الف جنيه وده كان كتير قوى وجابة لى فى علبه فضه ..المهر تعطيه الام للام زى الافلام القديمه

س:والشبكة ؟
الشبكة الحقيقة ان اشرف لم يحضر لى شبكه جاب لى دبله الماظ والشبكة كانت غاليه وماما اعطتنى الخاتم بتاعها

يعنى انتى لم تتشبكى ؟
لا

بابا كان عارف؟
اه

قبل ؟
ماهى قالت لى الشبكة فى الدولاب وجت يوم كتب كتابى واعطيتنى الخاتم وقالت لى يابنتى علشان يبقى اللى عندك اللى عاجبك واللى فى الدولاب !!!

واتفقوا يومها على الفرح ؟
عملنا فرح فى البيت وعزمنا اصحابنا فى الجامعه وبابا عزم ناس كتير
مين اللى كتب الكتاب ؟
الماذون اللى كتب كتاب اولادى

ومين اللى عزمهم بابا ؟
كل اعضاء مجلس الثورة والاقارب

كان حريص انه يعزم اعضاء مجلس الثورة ؟
لازم.. وهمه كانوا بيحبوا بعض



مين كان اقربهم له؟
همه كلهم كانوا قريبين فى الاول وبعدين بداءوا دة يستقيل ودة يمشى ..فى الاخر كان فيه المشيرعامر والرئيس السادات والنائب على صبرى والنائب زكريا محى الدين والنائب حسين الشافعى


·ابنة الرئيس تواصل حديثها مع عمرو الليثى
·منى عبد الناصر تكشف التقرير السرى للحالة الصحية لأبيها
عبد الناصر أصيب بـ .. السكر بعد فشل الوحدة .. والتهاب فى المفاصل بعد النكسة .. وذبحة صدرية أجبرته على تعيين نائب ولأول مرة صور فرح أشرف مروان ومنى عبد الناصر


فى حوارها الجرئ مع الاعلامى عمرو الليثى تحدثت منى عبد الناصر ابنة الزعيم الراحل عن العديد من الاسرار والخفايا التى عايشتها داخل بيت الزعيم .. تحدثت فى العدد السابق عن قصتها مع أشرف مروان واليوم تستكمل القصة إضافة الى الكشف عن العديد من الاسرار لأول مرة .

س : مين اللى احيا الفرح ؟
كان فيه عبد الحليم حافظ وام كلثوم انا كنت بحب عبد الحليم حافظ وانا كنت بقول لها طنط ثومه.. هى غنت] انت الحب{
المشكله كانت فى فرحى الراقصه.. انا كنت عاوزة زفتين .. وهو مش متصور انه هيمشى فى زفه فى منشيه البكرى ... قال لى عاوزة ايه؟ متصور هاقول له عاوزة دبابة.. فقلت له عاوزة منشيه البكرى من اولها لاخرها تبقى لمبات ملونه!!! وقعدوا 3 أيام يركبوا لمبات ملونه !!

س : الفرح حصل فيه ايه ؟جبتم راقصه ؟
انا قلت له عاوزة زفتين قال لى مش كفايه زفه واحده وقعدت اتحايل .. بحب سهير زكى ونجوى فؤاد وعاوزة الاتنين ..هدخل بزفه واطلع بزفه.. وقعدت اتحايل ودخلت بسهير زكى وروحت بنجوى فؤاد. وبعدين جت ماما قالت لى انا لى طلب.. انا عاوزة اشوف }دكتور الحقنى{قلت لة عاوزة دكتور الحقنى فقال لى هيلحقك على ايه الدكتور!!! واتعمل فى فرحى }دكتور الحقنى{

س:وأتي ثلاثى اضواء المسرح ؟
وكل الدنيا قاعدة وكان فيه روساء جمهورية وامراء وطلعوا قالوا دكتور الحقنى.. بنته وعاوز يسعدها وطلباتها دكتور الحقنى وزفتين !!

س : عامة فى الافراح الاباء يرقصوا ويشجعوا العروسه.. هل شاركك فى اى حاجه ؟
لا لا.. صورى فى الفرح كان قاعد ماسكنى وكل شويه يقول لى: مبسوطه اقول له اه

س : جاب لكى هديه ايه فى الفرح ؟
دى كانت ماساه ثانيه ودى غرقوا فيها هو والمشير عامر.. قلت له انا عاوزة فى الفرح حلق!! ونا لا انسى تعبير وشه والذهول اللى ظهر عليه ..اد كده انا تافهة!! فراح للمشير عامر وقال له دى عاوزة حلق انا هجيب لها حلق من اين.. فالمشير تطوع وقال له انا هجيب لها وجه قال له مشكلتك اتحلت !!

س : تزوجتى.. مين اللى جاب الشقة ؟
الوالد.. البيت اللى احنا فيه ده

س: يقال انه إستدان علشان يجيب لكى البيت ؟
نعم..لما مات كان مسدد بيت هدى وانا ماكنش لسه لان انا جبت بيتى فى فبراير 70

س : يعنى معقول عبد الناصر ماكنش معاه فلوس يجيب لابنته بيت ؟
ماهو كان بالتقسيط.. لان عبد الناصر كان بيعتقد انك لو اخدت حاجه مش بتاعتك يبقى قليت مقامك ..هو مات بدرى مات وعمره 52 يعنى هذا البيت عمله بابا بالتقسيط
ذهبتى على بيت الزوجيه ؟
جيت هنا كان بيتى ما خلصش ..انا خلفت جمال وكنت ساكنه فى الجيزة فقال لا تيجى تسكن فى البيت

س :عبد الناصر جد لاول حفيد.. لجمال اشرف مروان .. كيف كان جدا لحفيده ؟
كان فيه قبل جمال هاله بنت هدى اختى..هو بيحب الاطفال ولما جه جمال جيت قعدت فى منشية البكرى ولم اروح.. وكنت وقتها فى الجامعه.. كانت ماما تحب الاطفال واستحليت القعده وهنا ماكنش خلصت فقعدت مع ماما

س : احفاد عبد الناصر كان بيتعامل معاهم ازاى ؟

كاى جد.. لازم يبقى محضر اللبان والبنبونى علشان لما يجى له ياخد لبان وانا لما كنت ساكنه- الصبح كان لازم يدخل له جمال مع الفطار: اصل الطفل ده حاجه جميله ولما جيت البيت جمال صحى بالليل وقال لى انا عاوز اروح وقعد يعيط
( كان بينام بجواره )

س:وقعدتى عند بابافى البيت؟
رجعت بعد 9 شهور انا خلفت جمال بعد 9 شهور و10 ايام وفضلت قاعده لغاية فبراير سنه 70 وجيت البيت هنا.. وساكن هو فيه معايا .
العلاقة اللى كانت بين بابا واشرف مروان علاقة حميمة جداً .. علاقة واحد ساكن معاه فى البيت.. كان مثلا بيتغدى.. بنفطر.. بيلعب معاه بينج بونج وتنس.. بعد ما بابا تعب سنه 69 كان لازم يمشى ساعه ويمشى على بلاط واتعمل مشاية فى الجنينه- فكان بيجى يتمشى معاه

س : فى الفترة دى نقل مروان من المعامل الى مكتب الرئيس ؟
بعد حرب 67 انا كنت فى البيت وكنت لسه والده.. وكنا بننزل المخبا لما تيجى غاره وكلهم تطوعوا واشرف كان ضابط فى 67 وكان بيبات فى الاشلاء.. وبعدين بعد الحرب كان فيه مشاكل واشرف بعدها اشتغل مع سامى شرف .

س : عشتى مع عبد الناصر الفترة الاخيرة فى حياته ..شفتى النكسه ازاى فى عين عبد الناصر ؟
اوحش حاجه فى الدنيا.. كان تعيس لاقصى درجه ..هو كان معظم الوقت فى المكتب
الم تفكرى تكلميه ؟
اصل هقول له ايه اللى فكراه لما تنحى

ايه اللى حصل.. قال لكم انا هتنحى ؟
لا
ماقلش لماما تحيه انه هيتنحى ؟
لا ما اعرفش قال لماما والا لا.. لكن انا لم اكن اعرف وبعدين الدنيا كلها عرفت ..هو رجع وقال خلاص انا هنزل فى صفوف الشعب وهجاهد زى زيهم بس ماكنش يتنحى ويقعد..كان ناوى يتنحى ويجاهد لاسترجاع سيناء من العدو وكان حلم حياته.. انا اتكلمت معاه بعد كده بعد 9 و 10 يونيو وهو عاش عاوز اعاده بناء الجيش والعبور

س : حياته فى البيت تغيرت عن قبل النكسه ؟
طبعا.. اولا حسينا بالمرض اكثر لان هو كان عنده سكر بعد الوحده مع سوريا التغير فى شخصيته كان ايه ؟
كان حزين .. لغايه لما جت عمليه ايلات ورفعت من روحه المعنويه.. كان انسان لا يستسلم ..الحاجه الوحيدة اللى تمنعك انك تعافر فى الحياه الموت.. اكيد طول ما انت عايش ممكن تقلب الوضع

س : كلمينى عن يوم وفاه المشير عامر.. معروف الحساسية اللى تمت فى النهاية فى علاقة عبد الناصر بعامر وقيل انه قتل ولم ينتحر ..رد فعله ايه يوم ما توفى عبد الحكيم ؟
دى ما اقدرش اتكلم فيها لان دى افكار ناس
حزن على عبد الحكيم جداً طبعا.. انا ما اعرفش غير اللى انا شفته انا صحيت وكنت بحب المشير عامر جداً- صحيت وقراءت فى الجرائد طلعت اجرى على غرفه نومة وقلت له المشير المشير.. كنت بعيط عياط هستيرى.. دخلت وجدته بيعيط .. ما اقدرش اقول قال لى ايه الواحد بيتالم وخلاص.. وكانت لحظه صعبه هقول ايه امام الموت.. مافيش اى طريقة انك تحارب الموت ..

س : كلمينى عن علاقة الاب عبد الناصر بمدام تحيه.. يعنى مدام تحيه كانت لاتهوى الاعلام ولا الشهرة او عبد الناصر كان بيحب كده؟ كلمينى عن شخصيه مدام تحيه ولماذا كانت تبعد عن اجهزة الاعلام.. هل هدا كان مقصودا ؟

لا.. اولا هى كانت بتعمل كل المطلوب منها.. اى زوجه رئيس جمهورية كانت بتطلع لها المطار وترافقها..كان بيجى ناس فى البرتوكول تعلمنا وكانوا بيقولوا لها كل حاجه هتعملها بس هو ماكنش فيه تليفزيون.. كان فيه الجريدة ولونظرت للجريدة السينمائية فى مصر هتجد كل شئ بيحتمة عليها البروتوكول كانت بتعمله.. لا ننسى انها كانت فى مرحله يعنى هى خلفت حكيم والوالد كان رئيس جمهورية يعنى ماكنش عندها فراغ.. يمكن مع عدم وجود الاعلام.. كانت تحب القراءه والمزيكا وكانت تعزف سماعى وكان فيه علاقات جميلة فى البيت .. يوم الخميس حفله ام كلثوم كان لازم بابا يسجلها بنفسه وبعدين ينزل تانى يوم المكتب ويرجع على الظهر.. ماما تفضل طول اليوم قاعدة على البيانو تعزف الاغنية ولما يرجع يقول لها ياتحيه اعزفيها لى.. وده كل شئ بيحصل كل شهر.. وكان كل يوم لا يمكن ينزل السلم من غير ما يناديها .. بعد حادث المنشية كانت لازم تقف على السلم وتقراء له قراءن

س : هل عبد الناصر كان سى السيد ؟
سى السيد هيقول لها اضربى على البيانو!! كان يحب المزيكا قوى ويحب التصوير جدا وكان يصورها طوال النهار وبعد ما توفى دخلت الدولاب اخذ الصور.. وجدت صور نفسى فزعلت جدا لانى كنت عاوزة صوره هو

س : د / هدى اختارت انها تكون سكرتيره لبابا.. انتى ليه لم تفكرى انك تعملى معاه؟
الناس مختلفة.. يعنى انا وهدى نتكلم كل يوم الساعة 9.30 صباحا اختارها علشان شاطرة ومستعدة تقراء الملفات.. انا مش عاوزة اقرأ الملفات.. انا عاوزة العب رياضة وبحب حاجات اخرى.. اصل لما تخلف 5 مش هتجيب 5 زى بعض.. هى كانت شاطرة ولغاية دلوقتى لما اعوز حاجه اكلمها


س : ايه رايك فى الراى اللى بيقول ان د / مروان استفاد من زواجه من منى عبد الناصر ؟

انا استفدت من زواجى منه.. لما تتزوج جوازة وتبقى مش تعيس يبقى استفدت الزواج عائلة وانا كنت كمان ممكن اطلع نكديه..
انا اتكلم عن الاستفاده الوظيفية وتضخمة وقوته.. هل دة بسبب زواجه ابنه عبد الناصر وطبعا ده يتمناه كل شاب فى مصر ؟
طبعا ثقة السادات فيه كانت ترجع لانه زوج بنت عبد الناصر خصوصا لما فقد الثقه فيه كل من حوله او هو اعتقد ذلك وان كان فيه مؤامرة

-البعض يرى أنه اخطا عندما دعم السادات فى 15 مايو 71 ومن المعروف انه قدم الاستقالات الخاصه للسادات وتم اعتقال رجال عبد الناصر ووضعهم فى السجون بعد محاكمات استمرت شهور طويله.. ده مش غريب يعنى احنا قلنا السادات اختاره لانه زوج بنت عبد الناصر ؟

انا قلت لك انا كنت موجودة لما طلع بابا وقال انا جبت انور وحلف اليمين.. لانى طالع بالطائرة وممكن يصطادوها بالمضاد للطائرات.. واهم حاجه في مصر الاستقرار ..انا كنت واقفه مع الوالده ودى رساله من ربنا اعطاها لى ووضعت فى نفس الموقف.. لما وجدت ان هيحصل خلخله فى الاستقرار والعدو على القناة فاشرف كلمنى على الاستقالات فقلت له روح حذره علشان الإستقرار.. راح بسرعة وخلاص مشيت الامور.. بس انا لم يخطر فى بالى دول ولا دول ..اللى خطر فى بالى مصر والاستقرار

-الموضوع ده لم يثير حساسيه بين اخواتك ومروان ؟
أثار حساسيه لفترة ..بس بعد كده عدت ولم تستمر.. انا كنت مقتنعه وخلى بالك الموضوع ده كان فى الاول ( بعد وفاه عبد الناصر ) وهو اللى اختاره..
اختاره ليه ..يعنى ليه لم يختار الشافعى او زكريا محى الدين ؟
اكيد كان له نظره.. مش فى الاخر عبرنا.. انا لم اسئله لكن هو لن يختار لمصر حاجه صدفه..

اقترب مروان من السادات ودامت العلاقة لسنوات طويلة ..؟

بالضبط..لغاية اخر يوم قبل ما يتوفى السادات بثلاثة ايام والناس كانت فاكره ان فية خلافات .. كنا بنمثل ان فيه خلافات وهو ماكنش فيه ..


س إذن لماذا اقصاه من الهيئة العربية للتصنيع ومن رئاسه الجمهورية ؟

ما فكرتش ان جائز يكون ده حمايه له ..
من مين ؟
ماليش دعوه ( بس حمايه له ) طبعا انا متاكده

ماذا عن الحملات الصحفيه اللى كانت ضده فى الصحافه المصرية.. الاستاذ / موسى صبرى- وكان معروف انه كاتب السادات الاول- عندما يقول عنه )الطفل المعجزة( ايضا حمايه ؟

شوف.. الحياه دى يبقى فيها صراعات وناس فاهمه صح وناس فاهمه غلط.. وناس شايفه اللى على الوش وناس شايفه المستخبى.. لما تجيب الجرايد كلها هتجد فيها اسماء لسه خارجه من قضيه.. كتبوا كتاب ان ده خلاص اتغضب عليه وهم جائز كانو زعلانين منة.. فشايفين ان خلاص اتغضب عليه.. هو لم يتغضب عليه ولو نرجع للجرائد هنجد فى حادث معين (مش هسميه) ان حد اتكلم وشتمه فى كتبه.. انا رحت فى بيت السادات وكنت زعلانه.. الاخر اتي السادات بالثلاث جرائد: اهرام واخبار وجمهورية قال خلاص اعطوه الصفحه الاولى يرد فيها واعطوه الصفحه الاولى رد فيها.. هل فيه حد مغضوب عليه يرد فى الصفحه الاولى فى الثلاث جرائد ؟
هو كان طفل معجزة ..حاجه تغيظ انك واحد عمرك 27 سنه وطالع كده.. لو انا وكيل وزارة هتغاظ..
س : اذاً العمليه كانت تمثيلية لحمايه اشرف مروان ؟

طبعا ..
من مين ؟
منك ومن اسئلتك !!!

س : قلتى لى العلاقة استمرت قبل وفاه السادات بثلاثة ايام ؟

نعم ..ثلاثه ايام كنا عنده واتعشينا عنده فوق فى غرفه النوم ..
يعنى قاعدين معاه ومع مدام جيهان رغم ما نشر فى الصحافه المصرية وما قيل ان فيه خلاف بينه وبين مدام جيهان ؟
هو حد عارف فيه ايه داخل البيت.. قعدنا اتعشينا وكده وكان يوم ا أكتوبر وكنا مسافرين نعيش بره واغتيل يوم 6 أكتوبر ..


اصعب لحظه شوفتيها فى حياتك ..متى ؟

لحظة وفاه والدى ..وفاه امى ووفاه اشرف

اذاً كان اصعب لحظه 28 سبتمبر 1970.. كان هذا اليوم يوم وفاه الرئيس عبد الناصر ….اخر يوم فى حياة عبد الناصر

متى اصيب عبد الناصر بالسكر ؟

بعد الوحده 58

س : بعد الوحده ام بعد فشل الوحده ؟
بعد الوحده.. مش بعد الفشل ..هو كان عنده استعداد لان يكون عنده سكر لان اخوه كان عنده سكر ..كان بيشتغل كتير قوى وده كان شغلة زياده.. وبلدين وافكار مختلفة ..كان الاول فية حماس وبعدين تدخل تجد الحقيقة المره ..فكان بيشتغل كتير جدا ومسئوليته كبيره ..

س : ما تاثير فشل الوحده على زيادة السكر ؟

هو عاش طول عمره انا اشوف الصبح يجى الدكتور علشان يعطيه حقنه الانسولين.. قالوا لنا ان بابا عيان.. ماما كانت تقول لنا ماحدش يقول خالص.. لان لازم رئيس الجمهورية يبقى عفى علشان العدو لا يستغل مرضه وكان الموضوع مستخبى خالص.. انه مريض بالسكر..او اى مرض حتى الانفلونزا يقولوا لا ماتقولوش..





من الدكتور اللى تم تكليفه لعلاج عبد الناصر بعد اصابته بالسكر ؟

كان فيه الدكتور ثروت وبعدين كبر وبعدين الدكتور الصاوى حبيب كان بيجى كل يوم يقيس الضغط ويشوف السكر

س : هل كان معه دكتور مرافق ؟

اه.. دكتور ثروت كان بيجى له الصبح وبعد الظهر يقيس السكر لان كانوا يقيسوه بطرق بدائيه مش زى دلوقتى

هل كان بيصطحب الدكتور معاه فى اى زيارة ؟

طبعا لازم.. بل عكس كان فيه كمان سيارة اسعاف

هل سيارة الاسعاف فى الركاب بعد مرضه بالسكر ولا قبل كده ؟

لا دى من ضمن النظام لان ممكن يغتال.. ده نظام لازم لاى رئيس الجمهورية يمشى بسيارة اسعاف

كيف اثرت النكسه على الحاله الصحيه لعبد الناصر ؟

اصيب بالاتهاب فى الاعصاب .. ده بيجى من الانفعال الشديد وكان بيبقى وجع فى الارجل او الظهر هو جه له فى الرجلين والظهر وكانت الالام لا تطاق ومع ذلك كان يتحمل الالام دى وبعدين قالوا له فى اسخالطوبو(روسيا) فيه علاج لالتهاب الاعصاب .. راح وعمل وارتاح ومازالت مصحه اسخالطوبو بتعالج التهاب الاعصاب ..

يعنى اذنً حاله التهاب الاعصاب زادت بعد ذلك ؟

اه ..بتيجى من الانفعال والتوتر
ماهى طريقه العلاج التى كان يتم اتباعها فى موسكو ..هل كانت فعاله ؟

بالنسبه لالتهاب الاعصاب اتحسن.. بس دى حالات بتيجى وتروح مع الانفعال مش يبقى الواحد قاعد متوجع 24 ساعه وهو راح اسخالطوبو وهمه متقدمين فى الطب بس مش زى الامريكان ..

س : هل علاقته السيئة بالامريكان احالت دون ان يكون هناك الاستشفاء الاكبر ؟

نعم..احالت علاقتة السيئة بالغرب.. هو كان حلم حياته انه يروح باريس كان قد قرأ (عصفورمن الشرق) لتوفيق الحكيم.. فكان بيحلم انه يروح باريس وكان يقول لماما:بعد ما اخلص رسالتى اسلم البلد واخدك واروح باريس.. فحلم حياته انه يروح باريس

س : ايه رايك فى المقوله اللى تقول ان عبد الناصرمات بعد 67 ؟

بعد نكسه 67.. هو علمنى ان الموت بيجى مع الموت.. لكن طالما فيك نفس لازم تجاهد تقلب الاوضاع.. هو متى بطل يجاهد؟ لما راح النفس

س : هل فكر فى الاستقاله لسوء حالته الصحيه ؟

هو فكر فى الاستقاله لانه حس ان دى مسئوليه وان القائد المهزوم لازم يستقيل.. لكن لاسباب صحيه لم يفكر.. بالعكس ده بعد ايلات وحرب الاستنزاف حس انه هو هيفضل لاخر نفس يجاهد لغايه مايعبر.. كانت امنيه حياته العبور..

س : ما هى اهم الاحداث التى اثرت صحيا على عبد الناصر ؟

هزيمة 67 والشغل الذى ليس له اول ولا اخر فجينا سنه 69 وكانت اول ذبحه صدريه

كان فين ساعتها ؟
فى البيت.. افتكروا عنده انفلونزا.. طبعا خبوا علينا لان دى حاجه فيها خطوره على مصر.. ان تعرف ان عبد الناصر عنده ذبحه فقالوا لماما لا تقول ..وجدناهم بعد كده يبنوا مصعد فى البيت واللى عنده القلب ده زمان يرتاح ويقولوا لة لاتطلع سلم ..فركبوا مصعد ..
بعد كده قالوا له لازم تريح نفسك 15 يوم بدون انفعال.. فقعد زائد انه بطل السجاير ( هو كان شرة فى التدخين ) بس كان عنده قدره.. قالوا له لازم تبطل السجائرفلم ياخذ ولا نفس بعد كده لغايه ما مات.. وقال لو هى دى هتعوقنى انى احارب مش هاخدها..

وهو حين بدأ يشعر ان عنده ذبحه هل كان الدافع ان يفكر فى تعيين نائب رئيس الجمهورية ؟

هو طول عمره عنده اربع نواب

لكن فى الاخر اختار السادات على اعتبار انه الرئيس القادم ؟

ماحدش بيفتكر انه هيموت عمره 52 سنه

هل لم يفكر ان يسافر بره ؟
فى التاريخ ده لم تكن موجوده عمليات تغيير الشرايين لاهنا ولا فى امريكا ولا فى اى مكان

عندما عرف باصابته بازمة قلبيه لماذا لم يستجب لنصائح الاطباء بتقنين العمل ؟

استجاب على قده.. كان قاعد وماكنش بيخرج بس ما تقدرش.. يعنى انا كنت معاه فى غرفه النوم لما تم تبليغه بعمليه سرقه الردار ماهم لازم يكلموه..وبدأ يتكلم ويشتغل حتى وهو فى السرير

عبد الناصر كان يعالج فى الاتحاد السوفيتى.. قيل ان السوفيت كانوا ضالعين فى وفاه عبد الناصر.. تعقيبك ؟
لا تعقيب .. بالنسبه للمرض بتاع الوالد وحالته الصحيه.. بالنسبه للسكر و المجهود اللى كان بيعمله وبالنسبه لإصابته بالذبحه إضافه الي التقدم علمى المحدود وقتها..

من من الدكاتره اللذين اضيفوا لقائمه اطباء السكر بعد اصابته باول ازمه قلبية ؟

في د / منصور فايز وكان بيجى له دكتور من اسكندريه اسمه دكتور صلاح الدين وبلغوه

كيف اثرت حرب الاستنزاف على تدهور الحاله الصحيه لعبد الناصر ؟
طبعا كان بيزعل.. انا قاعده معاه فى الجنينهوبلغوهوقت بحر البقر.. دى من المرات اللى بكى فيها ..الكلمه اللى قالها: همه بيحاربوا بالزراير واحنا مش عارفين حتى ناخد الميج 21.. فعلشان كده الواحد لما تشوفه يبكى وامنية حياتة ان السلاح بتاعه يبقى فى مستوى سلاح العدو ممكن تعمل اى حاجه ..
كيف تلقى نبا استشهاد عبد المنعم رياض ؟
زعل جداً ..كان تعيس وبعدين تخيل انك انت فقدت واحد ذو خبره.. يعنى طبعا الحياه بعد 67 مش سهله وبناء من اول وجديد.. لكن كان عنده امل انه يوم من الايام هيعبر ..




·عمرو الليثى يواصل حواره مع بنت الرئيس
·منى عبد الناصر : أشرف مروان كان عايز يسكن بجوار السفارة الامريكية فى لندن خوفاً من القتل
·قتلوا أشرف مروان حتى يكون عبرة !!
·خلافه مع السادات كان مجرد كومفلاش

فى هذه الحلقة تروى منى عبد الناصر تفاصيل اليوم الاخير فى حياة عبد الناصر وترصد أدق تفاصيل اخر لحظات فى حياة الزعيم وكذلك تكشف أسرار مهمة حول مقتل الدكتور أشرف مروان ونوعية الخدمات الجليلة التى قدمها للوطن وتكشف أنه حتى بعدما خرج من مصر كان يقدم خدمات جليلة .. وتعترف منى عبد الناصر أن مذكرات مروان ربما كانت سبباً فى قتله .


هل اثرت احداث ايلول الاسود على عبد الناصر ؟
كان فى فندق الهيلتون وطبعا هو اجهد اجهاد شديد ناس مختلفة مع بعض بيتهىء لى اة لكن فى النهاية ادينى عمر وارمينى البحرمش هى دى اللى موتتة
يوم 28 سبتمبر.. احكى لى ماذا حدث؟
كنت انا موجوده مع اخواتى.. الوالد جه يوم 27 من الهليتون وبات فى البيت وكان تانى يوم بيودع الرؤساء وبعدين اتغدينا.. ونزل راح يودع امير الكويت ورجع كان اخواتى كلهم مشيوا وبقيت انا مع ماما.. دخل هو من بره.. وجدته تعبان ومجهد وقال لى روحى هاتى لى حاجه حلوه.. جبت له شيكولاته ودخلت له وقعدت معه ..قال لى اطلبى لى الدكتور الصاوى وكلمت الدكتور وكشف عليه ..عمل له رسم قلب وطلع على طول دكتور الصاوى طلب دكتور منصور وبعدين جه الدكتور منصور- وانا ما فهمتش يعنى- انا كنت شايفه كل حاجه امامى.. اللى فهمت ماما ان فيه خطر.. قالوا لى اطلعى .. طلعت وماما بتقول لى اقرئى قراءن ..قعدت تقرأ قراءن على طول ..لم افهم ايه اللى بيحصل وبعدين دخلت قعدت على الكرسى فى غرفه النوم وكان الدكاتره موجودين وبعدين قالوا إنه كويس ..كان منتظر خبر من ال B.B.Cكان بيحب محطه ال B.B.Cبس وبعدين قال لى اندهى لى الدكتور تانى.. طلعت ودخلت وجدتهم بيعملوا له تدليك للقلب.. ماما عرفت انه توفى وقالت لى )جمال راح( وقعدت تبكي.. انا لم اتخيل انه مات.. قبل كده جريت كلمت هدى وخالد وعبد الحكيم كان فى البحريه.. قلت لهم هاتوا اخواتى وجت هدى وكلهم ..دخل خالد وطلع قال لى (افهمي يامنى.. خلاص)- قبل ما يجى خالد هو توفى- منعونى من الدخول ..الحاجه الوحيده اللى خلتنى افهم ان مافيش حاجه طبيعيه ان عمر ماحد دخل غرفه نومه.. ناس داخله وطالعه.. بعدها عرفنا انه توفى.. دى المره الوحيده اللى دخلوا غرفه نومه.. بعد وفاته نزلوا تحت كلهم قعدوا يشوفوا هيعملوا ايه.. ويعلنوا ازاى.. واحنا قعدنا معاه احنا اولاده وماما وهم تولوا شئون الدولة بعد كده

كانت الساعه كام وقت الوفاه ؟

توفى الساعه 5.15 .. قبلها بربع ساعه كان بيتكلم معى فى الغرفه وقالوا انه توفى الساعه 5,05
ترتيب وصول الاطباء للمنزل.. من الاول ؟

دكتور الصاوى ثم د. منصور ولما طلبوا الدكتور فى الاسكندرية ارسل زوج ابنته زكى الرملى.. كل الدكاتره اللى بتعالجه حضروا وفيه دكاتره أتوا بعد ما توفى.. زى دكتور حمدى السيد

ماحدش فكر انه ينقله المستشفى ؟

ده اللى حصل.. انا شخصيا لم افكر.. الموضوع كان سريع سريع لانه جه الساعه 3 والساعه5.15 كان توفى.. ماحدش قال مستشفى ولم ارى حتى سيارة اسعاف ولا حاجه
اذنً مات فجاه ؟الدكاتره قالوا ايه ؟
ماحدش كان بيتكلم.. كله كان بيجرى
هل البيت كان مجهز ؟
كان عنده اكسجين فى الغرفه
تفسرى بايه ان دكتور رفاعى كامل رفض يوقع على تقرير الوفاه ؟

قالوا لى.. بس فى الاخر وقع.. ما هو واحد ممكن تكون شخصيته انه يراجع
هل بس كده ولا مش موافق على اسباب الوفاه ؟
يسئل هو.. انا اعتقد ان فيه شخصيات فى حاجه ان تتريث الامر.. ده توقيع تاريخى بس فى الاخر وقع ..كل واحد حسب شخصيته

استاذ هيكل كتب وقال ان الامل ضاع الساعه 6.15 وفى روايه اخرى انه توفى عقب سماع موجز الخامسة كيف ذلك ؟

هو مات الساعه5.15


هيكل قال ان السادات اخر من دخل غرفه عبد الناصر.. من اخر من دخل الغرفه ؟
ما اعرفش.. بس السادات ساكن فى الجيزة وجم تبع ساكنين فين..يعنى انا كلمت اخواتى وكل واحد كلم اللى يحس انه هو يهمه.. كان فيه تخبط بس كل واحد جه حسب ساكن فين
هناك راى يقول ان الدكتور صاوى حبيب اخطاء فى التعامل مع حاله عبد الناصر.. لان الحاله كانت غيبوبه سكر ولم تكن نوبه قلبية ؟

انا عمرى ما شفت الوالد جت له غيبوبه سكر.. ولا مره ..وهو كان انسان منظم جداً وكان منتظم فى اكله .. فلم يعاني ولا مره غيبوبة سكر..
هذا الراى يمكن ان يؤكد من خلال ان الرئيس استدار وفتح جهاز الراديو.. هل المصاب بذبحه صدريه يمكن ان يتحرك ؟

لا لا لا لم يتحرك.. تدخل البيت الراديو كدة والاقلام مرصوصة ..
اللى قاله دكتور رفاعى قال نزلت لتحت علشان اعرف سبب الوفاه رايت نسبه التجلط 22% واطلعت على رسم القلب فتاكدت انه لم يصاب بذبحه قلبيه ؟
ده الوحيد اللى قال كده ..الباقى قالوا ايه؟ فلنأخد الاغلبيه..
هل هناك تضارب فى التقارير الطبية ؟
انا عمرى ما شكيت.. وانا اميل انه مات بازمه قلبيه خصوصا انا عشت مع واحد يعانى من القلبمع أشرف..
يقال ان عبد الناصر تناول 2/1 تفاحه من صندوق تفاح احضره الوفد اللبنانى وبعد ساعتين بداءت المتاعب تظهر.. يقال ان هذه التفاحه مسمومه ؟
اذا كان فيه صندوق تفاح كان زمانى كلت نصفه ..واذا كان فيه صندوق تفاح من لبنان فكلنا اكلنا منه

كيف كان ياكل عبد الناصر ؟

هو كان ياكل الاكل الطبيعى.. ولما أصيب بالسكر كان ياكل المسموح له

يعنى كان حريص فى اكله ؟

بالضبط ..وعنده قوه اراده

من هو المنوط بشراء مستلزمات المنزل من الاكل وكيف يتم شرائها ؟

كان فيه ناس عسكرين همه اللى كانوا بيشتروا مستلزمات الاكل

هل كان فيه رقابه على مطبخ الرئيس ؟

كان هناك مخبر خصوصا ان عبد الناصر كان مهدد بالاغتيال وكان فيه مؤامرات لوضع السم فى الاكل
كام مره حصل هذا الموضوع ؟
دى مره..بس مش فاكره تواريخ

يعنى فى محاوله لدس السم لعبد الناصر ؟

لدس السم اه ..فى اكل فى البيت ..هو عمره ما اكل بره البيت لكن مافيش وجبه لم تاكل فيها كلنا وماحدش تعب مننا

س : دكتور رفاعى يقول ان السيده تحيه اخبرته ان عندما عاد عبد الناصر كان متعب ويصب عرقا ..وان دكتور الصاوى اعطاه حقنه انسولين وحقنه بانتوبون..عندما ذهب د/رفاعى للفريق فوزى فى الجنازة قال له انه وقع على شهاده الوفاه بالخطأ وان الرئيس لم يمت بنوبه قلبيه فرد عليه الفريق فوزى وقال له: اسكت…. تعقيبك ايه؟

هو الدكتور الصاوى قال ايه انا ما اعرفش هو اعطاه ايه

دكتور الصاوى قال انه مات بازمه قلبيه فى هذا لقاء معي ؟

دكتور الصاوى هو اللى عارف اعطاه ايه.. انا لا اشكك فى روايه دكتور الصاوى لانى أثق فيه
احكى لى المشهد الاخير فى جنازة عبد الناصر ؟
انا لغايه النهارده لم ارى فيلم الجنازة.. لم اقدر ان اكمله..
فاكره اللى حصل الجثمان.. قعد فى البيت ؟
فاكره واحنا قاعدين معاه فى الغرفه ..فاكره وهو نازل من البيت زى اى واحد رايح يقابل ربه.. شايلينه كل الناس نازلين به السلالم ووضعوه فى السيارة وراحو به قضر القبه وقعدوا 3 أيام.. كنت بصمم كل يوم اروح له
الجثمان قعد هناك فى قصر القبه ؟
فى الثلاجه.. وبعدين الجنازة طلعت من مجلس الثورة فى الجزيرة لكن خلاص بقى هتفتكر ايه..
لكن الجنازة لم تكن عادية ؟
انا بفتكر وهو نازل من البيت.. دى الحاجه اللى عالقة فى ذهنى ..صعب
هل الجثمان كان موجود على عربه الدفع امطائرة هليوكوبتر ؟
كان على عربه المدفع.. نزلوا اخواتى تحت دفنوه لان احنا كنا لازم نعمل زى ما الاسلام بيقول.. كان فيه ملايين ماشية محترماه والجنازة قعدت من الصبح لليل ..لم يتزحزح الجثمان
عقب نقل الجثمان للقبه.. هل هناك مثال عمل تمثال لعبد الناصر ؟
اه.. هدى اختى عارفه الحكايه دى ..انا سامعه الكلام ده من هدى وبعدين انا لم اكن مركزة قوى

قيل ان عبد الناصر مات مديون ؟

لا.. هو كان عليه اقساط ..اللى عليه اقساط يبقى مديون.. كان عليه اقساط بيتى ..

هل تغيرت المفاهيم بالنسبه لكى ؟

لا لغايه النهارده لا على الاطلاق.. حب عبد الناصر ده شئ مستمر خصوصا مع اللى استفادوا من التعليم

من الذى قتل أشرف مروان؟
العدو
عدو من؟ عدو اشرف مروان ام عدو منى ام عدو مصر؟
انت شفت الحوار اللى كان على القناة الثانية فى احتفالات اكتوبر وطلع مسئول من المخابرات الحربية قالوا كل شىء.. دة رد على كل شى وقالوا كلام وطلعوا اسرار علشان خاطره.. وانا بشكر سيادة الرئيس انه أعطى الامر للمخابرات الحربية انها تطلع الكلام دة لتبرئته..

اذن..ً مروان قتل ولم ينتحر ؟

طبعا.. اكيد

كيف ترين سيناريو قتله ؟
هناك اتنين دخلوا وهو نزل.. انا عرفت بعد كده انهم كانوا سايبين الباب -باب البيت- السائق كان سايب باب البيت علشان خاطر بعد ما نزل الشنط وقعد يتفرج على استلام رئيس الوزارة.. دخل اتنين وهو كان ضعيف
قلنا ان فيه شخصان .. و البواب ترك الباب مفتوح ؟
انا بشوف ان فيه ناس دخلوا ..اثنين زى ماقال الشاهد المجرى واخذوه من المكتب ..لإنى لما رحت له فى المشرحه وجدته مضروب في صدره.. جزء من صدره مفتوح.. اخدوه وشالوه وحدفوه وهم ماكنوش عاملين فى حسابهم الست اليابانية اللى فى الدور الرابع اللى سمعت الصرخه وبعدين شافت حد بيترمى..

مين بقى دول تعرفى ومش عاوزة تقولى ؟

مافيش حاجه ماشفتهاش نقدر تعرفها معرفة اليقين

احساسك بيقول لكى ايه ؟

احساسى بيقول لى انه اتعمل منه عبره لغيره ..هو لما ظهرت بداءوا عند العدو يخبطوا فى بعض

تقصدى الصراع اللى بين المخابرات الاسرائيلية والعسكرية ؟
ماليش دعوه بالسياسه.. هو كان طول عمره متوقع إغتياله.. لدرجة ان كل ما تعدى سنه كان بينبسط انه عاشها
هو كان عارف انه هيقتل؟
اه من زمان ..من بعد 73.. على طول كان متأكد انه مش هيعيش واستمر هذا الوضع لغايه عام 2007 …..إلى ان حضر هنا فى مصر فرح السيد جمال مبارك وقال: عاوز اقعد هنا والغريبه انه اكتشفت حكايه قتله باجهزة التنفس: بحيث انه وهو نايم وبيضع جهاز التنفس يحرق اكثر.. كان كل مايضع جهاز التنفس تزداد الخطوره.. كان كل شويه يشترى اجهزة احدث ويعطى القديم للملحق التجارى.. هو كان شاطر ويحب يقرأ فإشتري واحد وتركه هنا على انه راجع تانىبعد زياره الي امريكا ..في امريكا كشفوا عليه و قاموا بمراجعة الجهاز الذي يستخدمه.. فاكتشفوا انه ملعوب فيه فارسل لأحضار باقي الاجهزة من مصر وفعلا وجد الاجهزة ملعوب فيها

مين اللى عمل كده ؟

انسان.. ماهو اللى عاوز كده عاوز يقتله.. بعد كده لاحظت انه على طول يغلق الاقفال وبعدين بدأ يقول لى تعالى نقعد فى فندق.. وبعدين جت له فتره يقول انا عاوز اعزل من كارلتون هاوس ونروح نسكن بجوار السفاره الامريكى علشان مومنة اكثر..هو كان شاطر و كان واخد كورسات فى المخابرات

هل توافقى على الراى الذى يقول انه خلاف على عموله سلاح ؟

لا ..بالعكس.. هو كان بيعمل فى البورصه وعمره ما اشتغل بالسلاح إلا وقت عمله فى الهيئة العربية للتصنيع ..ولما رحنا لندن عمل فى البورصه

رايك فى من يقول انه كان عميل للمخابرات الاسرائيليه وانه ابلغهم بميعاد الحرب ؟

لو كده السؤال يبقى سخيف ولا يستحق الرد.. انت تفتكر شريك عمرى وحياتى وحبيبى يتصرف بهذا الاسلوب ؟وبعدين انت عاوز تعبر.. انا شخصيا لو قالوا لى نطى من الطائرة هنط علشان نعبر.. احنا بعد 67 كنا عاوزين نشيل الهزيمه

لو كان على صلته باسرائيل.. كان تعليمات من مصر ؟

ده شئ لا يسئل.. لانه شئ واضح انا مش هدافع عن حاجه لا تستاهل الدفاع لان ده شئ واثقه منه 100%..كل واحد جاهد بطريقته انت جاهدت كان عمرك كام.. 4 سنوات مش عارفه انت جاهدت ازاى !!!

هل فكرتى تقاضى الصحف الاسرائيلية ؟

حد يفكر يقاضى العدو هتروح تقاضيهم علشان اتكلموا ولا هتقاضيهم علشان رمونا بالقنابل فوق دماغنا !!
ىتردى بايه على البعض الذين اتهموه بهذه الاتهامات ؟

مش مستاهلين الرد.. وعلشان كده انا ماردتش .. مش هقول اى حاجه ولن عطى اى شخص اى معلومات ..

الرئيس مبارك تانى يوم وفاه مروان قال للصحف انه قدم خدمات جليله لمصر…. ما طبيعه هذه الخدمات ؟
كل حاجه طلبت منه عملها وبكفاءه شديدة..
ممكن تلقى الضوء عليها ؟
لا ..هى سر.. يعنى السادات لما اعطاه الوسام قال انه ساهم.. حين قال الرئيس انه قدم خدمات ..قدم كل حاجه طلبت منه وبكفاءة عاليه بحيث انهم كانوا بيطلبوا منه المزيد لغايه يوم ما مات
يعنى علاقتة بالعمل الوطنى استمرت حتى يوم وفاته؟
لا مش للاخر.. لانه مرض من سنوات.. لكن طول ما كان عفى طبعا.. بس المرض بيخليك تلتفت لنفسك وصحتك
هل تعتقدى انه دفع حياته ثمن للمذكرات اللى كتبها.. هل فيه مذكرات كتبها ؟
نعم .. كان يقرائها لى
ممكن نعرف بعض ماجاء فيها ؟
هى ماكنتش مذكرات ..كان بيحكى ..هى كانت عبارة عن دراسه بالوثائق من هنا وهنا وكان عايش اللحظه ..كان بيروح يدور على الحاجه اللى تكذبها او تؤكدها يعنى توثيق وكان معاه فريق عمل

هل دون فيها دوره مع المخابرات المصريه ضد المخابرات الاسرائيلية ؟

لم يقول لى حاجه زى دى.. هو كتوم
هل كان كتوما حتي مع زوجته ؟
نعم ..لكن دلوقتى فى عصر التجسس والتكنولوجيا لو عندك حاجه عاوز تعملها لوحدك ..ماتحلمش بهذا لانك ممكن تنفضح

هل تعتقدين ان تم تصفيته علشان المذكرات ولا انتقاما منه ؟

الاثنان بس اساسا الإنتقام.. لان اللى عمله مش سهل انهم يتقبلوه ..نفذ الاوامر اللى قيلت له بشده وبمنتهى الكفاءه ..

==========================
بعض الصور الحصريه التي تعرض لاول مرة لعائله جمال عبد الناصر وصور حفل الزفاف مني واشرف مروان






































التوقيع:


رد مع اقتباس
قديم 01-05-2010, 01:15 AM   رقم المشاركة : [2]
moontears
عضو
 
افتراضي

الف شكر على الموضوع والمجهود الرائع


moontears غير متواجد حالياً   رد مع اقتباس
قديم 01-07-2010, 02:50 AM   رقم المشاركة : [3]
نورهان
عضو
 
افتراضي

الف شكر يا استاذ على وبجد مجهود رائع .......الموضوع والصور جميلة والواحد اول مرة يشوفها .الملف والحلقات بتاعت اشرف مروان كانوا جامدين جدااا


نورهان غير متواجد حالياً   رد مع اقتباس
قديم 01-07-2010, 08:32 PM   رقم المشاركة : [4]
tota
عضو
 
افتراضي

بجد اول مرة اشوف الصور واعرف الموضوع ده ربنا يكرمك يااستاذ عمرو على مجهودك


tota غير متواجد حالياً   رد مع اقتباس
قديم 01-10-2010, 06:42 PM   رقم المشاركة : [5]
wa7d mn el naas
عضو
 
افتراضي

[RAMS]http://www.6rbtop.com[/RAMS]


wa7d mn el naas غير متواجد حالياً   رد مع اقتباس
قديم 04-04-2010, 10:03 AM   رقم المشاركة : [6]
احمد مختار
مشرف عام
الصورة الرمزية احمد مختار
 
إرسال رسالة عبر مراسل Yahoo إلى احمد مختار
افتراضي

مشكور على عالحصريات دى
موضوع وصور اكثر من رائعة


التوقيع:


احمد مختار غير متواجد حالياً   رد مع اقتباس
قديم 04-11-2010, 02:13 PM   رقم المشاركة : [7]
عبد الحميد أبو هاشم
عضو
 
افتراضي

سعدت كثيرا جدا بنضمامى إلى منتداكم الراقى وهان أتصفح بعض الموضوعات ولاأجد من الكلمات مأعبر به عن مدىشكرى وتقدير وإمتنانى لكل الساده القائمين على إدارة الموقع وللأستاذ الكبير والإعلامى المتميز الإستاذ عمر الليثى صاحب القلم الجرئ والمخلص والكلمة الصادقة التى تترجم مشاعر الجميع وإن صح التعبير فهو قارىئ الأفكار التى تدور بخلد كل مخلص
تقبلوا خالص تحياتى وعميق شكرى وتقدير وتحية لكم من أرض الفيروز سيناء الحبيبة


عبد الحميد أبو هاشم غير متواجد حالياً   رد مع اقتباس
قديم 04-27-2010, 01:56 PM   رقم المشاركة : [8]
الجنرال
عضو
 
افتراضي

موفق بإذن الله ... لك مني أجمل تحية . ألف مبروك .. لقد سعدت بهذا الخبر أجمعين


الجنرال غير متواجد حالياً   رد مع اقتباس
قديم 04-28-2010, 06:18 PM   رقم المشاركة : [9]
الاميرة السمراء
عضو
 
افتراضي

الف شكر على هاي المعلومات القيمة وربنا يكرمك يااستاذ عمرو


الاميرة السمراء غير متواجد حالياً   رد مع اقتباس
قديم 07-07-2010, 12:21 PM   رقم المشاركة : [10]
ahmed711
عضو
 
افتراضي

السلام عليكم ورحمة الله وبركاته الحمدلله والصلاة والسلام على رسول الله وعلى آله وصحبه أجمعين سعدت كثيرا بالانضمام لهذا المنتدى


ahmed711 غير متواجد حالياً   رد مع اقتباس
إضافة رد

مواقع النشر (المفضلة)

الكلمات الدلالية (Tags)
21-3-2009عمرو, للعائله, لاول, الليثى, الناصر, تعرض, جمال, يحاور, واسرار, وصور


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع