|
حملة حقك من حقك .. الملف الأول .. حقوق الانسان .. الجزء الأول
انهاردة اول يوم في حملة حقك من حقك ... طبعا بنرحب بيكم كلكم وبنقولكم يارب يكون العيد كان سعيد عليكم ...
فضلنا ان احنا نتكلم بلغة كل الناس تفهمها ... لغتنا العادية اللي بنتعامل بيها في كل مكان ... في الشارع وفي البيت وفي الشغل ... علشان نقدر نوصل لأكبر عدد من المصريين ... طبعا زى مانتوا عارفين حملة "حقك من حقك" هدفها اننا نخلي كل مواطن مصري يعرف حقه .. وأكيد بعد كده هنقول هياخده ازاي ... بس الأول يعرفه ... زي ما قولنا الحملة متكونة من خمس ملفات .. الملف الأول : حقوق الانسان (جوه مصر وبره مصر) الملف التاني : التعليم ومشاكله الملف التالت : الصحة الملف الرابع : الاستثمار الملف الخامس : الأجور الحملة مدتها 15 يوم .. يعني هنخصص لكل ملف 3 ايام .. هيبقى فيه توبيكات .. وهيبقى فيه فيديوهات .. وهيبقى فيه كمان رسايل على إميلات وموبايلات الناس الناس اللى بعتتلنا وعاوزة تعرف حقوقها .. وهيكون فيه كمان استقبال لأسئلتكم عن أي مشكلة حصلتلكم ونقولكم حقكم فين فيها.. وكمان هنحاول نقدم المساعدة للي عاوزنا نساعده على قد ما نقدر.. وهنبتدي مع بعض دلوقت الملف الأول ... ملف حقوق الانسان .. |
الجزء الأول : كرامتك في بلدك :
مجال حقوق الانسان مجال كبير أوي , وبيتضمن حاجات كتير أوي .. الحق في حياة كريمة والحق في السكن والحق في العلاج الآمن والحق في التعليم وغيره وغيره ...
احنا اختارنا منه أهم جزئيتين وأبسط جزئيتين لأي مصري نتكلم عنهم .. اللي مفيش أي مواطن يقدر يعيش من غيرهم وكل حاجة علشانهم تهون .. اللي هم كرامة المواطن جوه مصر , وكرامته بره مصر .. ================== الجزء الأول : كرامتك في بلدك : ================== كتير مننا اتعرضوا لمواقف مع أفراد من الشرطة سواء كان أمين أو ظابط أو أيا كان ومعرفوش يتصرفوا فيها ازاي .. وسألوا نفسهم ياترى هو من حقه يضربني على قفايا ؟؟ هل من حقه يفتشني ؟؟ طيب من حقه يشتم ويشخط وينطر زي ما يكون اشتراني ؟؟ هل من حقه ياخدني على القسم ؟؟ طيب انا اتصرف معاه ازاي ؟؟ بص يا سيدي ..هنتكلم دلوقت عن شوية مشاكل ونقول الحلول بتاعتها مع بعض , ولو قابلتك أي مشكلة مش موجودة في اللى احنا قولناه ابعتلنا واحنا نرد عليك فيها ... --------------------------------------------------------- المشكلة الأولى : حد لابس ميري أو مدني ووقفك في الشارع : --------------------------------------------------------- طبعا أكيد معظمنا اتعرضنا للموقف ده ... في كمين أو غيره ... تلاقي واحد لابس ميري أو مدني يجي يقولك بطاقتك .. ويسألك رايح فين ؟؟ وجاي منين ؟؟ و ليه ؟؟ وعلشان ايه ؟؟ ومش بعيد كمان يفتشك ... ومش بعيد كمان انه ياخدك على القسم بدون سبب واضح ويقولك اشتباه او تحري ... في الاول بس علشان تبقوا عارفين ... مابقاش فيه حاجة اسمها اشتباه ... الاشتباه ده اتلغى من سنة 93 وده بحكم من المحكمة الدستورية العليا .. طيب امتى بتوع الشرطة بيوقفوا حد ؟؟ زي ما اتقال في القانون لما بيكون حط نفسه في موضع شك .. يعني ايه ... يعني مثلا واحد شايل تليفزيون وبيجري بيه وبيتلفت يمين وشمال .. ده اسمه موضع شك ... مثلا واحد واقف جنب عربية وعمال يتلفت .. واحد بيجري وعلى هدومه دم .. كده يعني .. ------------------ حقك واللي من حقك : ------------------ من حقك أي حد يوقفك في أي مكان كمين او غيره , وأيا كانت رتبته أو ايا كان لبسه ...انك تطلب منه يعرفك بنفسه الأول ... وهو اللي يثبت شخصيته الأول ... يعني لو قالك انا ظابط .. قوله لو سمحت كارنيهك ... هتقولي ماهو لابس ميري وفيه دبابير وحاجات كتير على كتفه ... ياعم انزل الوكالة هتلاقي بدل من دول على قفا من يشيل بدبابيرهم بنسورهم بسيوفهم ... ماتطلعلوش أي اثبات شخصية ليك غير لما هو يقولك هو مين الأول ويطلعلك اثبات شخصيته .. وبعدها من حقه انه يشوف بطاقتك أواثبات شخصيتك ( بطاقة أو جواز سفر أو رخصة سواقة ) وبس مش اكتر من كده ...يعني مش من حقه يفتشك ولا ياخدك على القسم ولا يضربك ولا كل الكلام ده ... وخليك واثق من نفسك وانت بتقوله كده ... لأن ده حقك .. لو لقاك مهزوز أو خايف ... هيحس انه هو الأقوى ويبدأ يتعامل معاك بعنف ... لو حس انك مش خايف وعارف حقك ... هتلاقيه يعاملك باحترام غصب عنه .. طيب ياترى ده حقك فعلا بالقانون .. آه من حقك ... القانون بيقول في المادة 24 مكرر من قانون الاجراءات الجنائية واللي انضافت بالقانون رقم 174 لسنة 1998 ان لازم كل واحد من افراد الشرطة ايا كانت رتبته لازم يعرف نفسه للمواطنين ... طيب لو فرض بقى وخد البطاقة وما دهالكش ؟؟ مش من حقه طبعا .. وساعتها من حقك تعمل ضده محضر كمان في أقرب قسم أو مركز ... وده برضه حقك بالقانون 143 لسنة 94 للاحوال المدنية وتحديدا في المادة 50 .. طيب لو فرض وقالك تعالى معايا على القسم ؟؟ اسأله ليه .. لو قالك اشتباه قوله الاشتباه اتلغى .. زي ما قولنا الاشتباه اتلغى فعلا من سنة 93 .. طيب لو قالك تحري .. قوله حتى لو تحري مش من حقك تاخدني القسم ... وده زي ما قالت المادة 362 من تعليمات النيابة .. طيب لو فرض بقى يا جميل و نسيت بطاقتك في البيت ؟؟ شوف يا سيدي .. في الحالة دي هتروح القسم أو المركز معاه ... متخافش ... مش هيحبسك لأن مش من حقه يحبسك ... هتتصل بحد من اهلك او اصحابك يجيبلك بطاقتك أو إثبات شخصيتك ... أو ممكن حل تاني انك هتتعملك مخالفة وهتدفع مبلغ ما يقلش عن 100 جنيه وما يزيدش عن 200 جنيه .. يعني ما تخليش حد ينصب عليك في أكتر من كده ... وكمان مش من حقه في الحالة دي انه يحبسك ... وده برضه من حقك بالقانون زي ما قالت المادة 68 من القانون 143 لسنة 94 للاحوال المدنية .. يتبع .... |
كلام جميل
بس عايز اقولك على حاجة احنا حقوقنا كتير جدا بس هيا فين ومين اللى هيسمعك خليك عملت كدا مع ظابط وشتمك او قل ادبه عليك هتعمل ايه هتروح القسم هيبهدلوك ياسيدى الفاضل احنا فى دولة بلا قانون |
فعلا كلامك جميل بس مينفعش عندنا فى مصر ممكن فى اى بلد تانيةلانك لو قلت اى حاجة من الكلام دة هتروح القسم وعلية العوض فيك
|
فكرتك رائعه احيك عليها بس مين هيسمع لك؟ للاسف الشديد مش هنقدر ولا هتقدر تعمل حاجه خالص
|
والله هو الفكرة حلوة والاحلي اانا نقدر نعمل ده
بتهيالي ان ساعة التنفيذ هيبقي فيه كلام تاني بس اهو خلينا نقول اكيد هيجي اليوم اللي يتحقق فيه ان المصريين يا خدوا حقوقهم |
يا متر موضوعك جميل ولذيذ جدا جدا بس بص يا سيدى لو افترضنا كما قلت حد وقفنا فى الشارع وطلب البطاقه وقولتله كما قلت انت مين هتلاقى القفى ولع على طول بص ده مش مع كل الناس عارف لانهم بيعرفو هما بيقفو مين وبيتعاملو مع مين يعنى مش اى حد والله دا امين شرطه ولما بينشن بينشن صح يا استاذى وانت وانا فاهمين بينشن على ايه بالضبط http://www.ididdy.com/images/Nano_Combo_Wallet_BK_5.jpg وعلى العموم لو عايز الكلام ده يحصل مش عندنا صدقنى http://www.elaph.com/elaphweb/Resour...dab83d6ae5.jpg |
بصراحة مع احترامى للاستاذ أحمد مختار وعلى الشامى وسبايسى وابو شهد لاأتفق معكم اطلاقا عذرا طول ماحنا بنقول الكلام الفاشل والمحبط يبقى هنفضل تحت رحمة الاهانة والذل كفااااااااااااااااااااااااااااااااااااااااااااية ,لازم نفوق ونعرف الحكومة الفاشلة دى اننا عندنا حقوق وكرامة زى اى شعب محترم فى الكون ,يبقى لازم نقف واقفة ونبطل الكلام الفاشل والمحبط احمد زويل لو كان سمع كلام الناس مكنش بقى زويل ,ممتاز ياخالد كمل واكيد هيجى يوم ترجع فيه كرامتنا كمل وملكش دعوة بأى حد يقولك كلمة احباط او مش ينفع فى البلد دة كمل وميهمكش كلام اى حد .وربنا يوفقك وتكون رايه للكرامة فى مصر واكيد شباب مصر هم مستقبلها كمل حتى لوكنت انا ومجموعة قليلة نؤيدك كمل .
ويجب ان يكون شعارنا كن ايجابيا واتخذ خطوة من اجل الاصلاح |
بعد اذنك يا استاذ خالد بردو مش فى مصر مع احترامى لكلمه مصرام الدنيا يا بسمه دى الحقيقه لما يبقى واحد غلبان ماشى فى حاله وذاهب الى بيته ويقابله ؟ امين شرطه ويقوله رايح فين يالا يبقى فين الكرامه اللى بتتكلمى عليها يا بسمه لما امين شرطه يمسك شاب فى الشارع وامام المارة يقلعو البنطلون بحجه التفتيش يبقى فين الكرامه يا بسمه http://2.bp.blogspot.com/_BXyoparxUY...20/0000000.jpg الحكومه فيها اشياء يجب ان تتغيركثيرة واولها امين الشرطه لانهم فعلا يا بسمه مفتريين http://4.bp.blogspot.com/_GEfZuCUWJ-...9281015200.jpg اغلبيتنا راينا ما فعل بهذا الشاب بعد ايه الكرامه اترديت ليه بعد قله الادب http://img50.imageshack.us/img50/7590/slapgo1.jpg الحكومه بقا فيها http://forum.arjwan.com/imgcache/14101.imgcache |
كرامة المواطن
سوال هل دى هى مصر ؟
لا لا لا لا لا اجيبونى |
| الساعة الآن 04:16 AM. |
Powered by vBulletin® Version 3.8.12 by vBS
Copyright ©2000 - 2024, Jelsoft Enterprises Ltd.
جميع المشاركات والمواضيع بالمنتدى تعبر عن وجهة نظر كاتبها ولا تعبر بالضرورة عن وجهه نظر الموقع
الموقع برعاية الشركة المصرية لتطبيقات الانترنت